2024-жылы дүйнө боюнча 50 миң аял жана кыз өзүнүн жакын өнөктөшү же үй-бүлө мүчөсү тарабынан өлтүрүлгөн. Бул күн сайын орто эсеп менен 137 же ар бир 10 мүнөт сайын бир аял же кыздын өлтүрүлгөнүн билдирет. Бул маалыматтар БУУнун Аялдарга карата зомбулукту жоюу боюнча эл аралык күнгө карата жарыяланган жаңы докладында айтылды.

Баяндамага ылайык, былтыр дүйнө боюнча жалпы 83 миң аял жана кыз атайылап өлтүрүлгөн. Алардын 60%ы же 50 миңи жакын өнөктөштөрү же туугандары тарабынан өлтүрүлгөн. Салыштыруу үчүн: өлтүрүлгөн эркектердин болгону 11%ы гана өнөктөшү же тууганы тарабынан өлтүрүлгөн.

«БУУ-Айымдар» түзүмүнүн саясат жана программалар бөлүмүнүн директору Сара Хендрикстин айтымында, фемицид ашыкча көзөмөлгө алуу, коркутуу, кугунтуктоо сыяктуу туруктуу жасалган зомбулуктун акыркы чекити болуп саналат.

Докладда айтылгандай, интимдик өнөктөштөр же үй-бүлө мүчөлөрү тарабынан жасалган фемициддердин эң жогорку көрсөткүчү Африкада катталган. Анда ар бир 100 миң аялга жана кызга 3 учур туура келет. Андан кийин Америка (1,5), Океания (1,4), Азия (0,7) жана Европа (0,5) турат.