Бишкек шаарындагы Дөлөн Өмүрзаков атындагы стадион машыгуулар үчүн ачылды. Бул тууралуу Жаштар иштери, дене тарбия жана спорт мамлекеттик агенттигинен маалымдашты.
Андагы маалыматта айтылгандай, 27-майдан тарта стадиондун чуркоочу тилкеде машыгуу өткөрүүгө уруксат берилди. Стадиондо тиешелүү санитардык талаптар, гигиеналык эрежелер сакталышы керек. Ошондой эле, коронавирус инфекциясынан коргонуу максатында стадионго келгендер ортодо 1,5 м аралыкты сактап, машыгыш керек.
Стадиондун кире беришинде машыгууга келгендердин жана кызматкерлердин дене табын текшерүү жүргүзүлөт.
Бардык каалоочуулар күнүгө эртең менен саат 06:00дөн 09:00гө чейин, кечинде саат 18:00дөн 21:00гө чейин стадиондо машыга алышат.
Кирүү акысыз. Машыгууга келгендер стадионго спорттук бут кийим менен гана киргизилет.
