Кыргызстандын Эмгек, социалдык камсыздоо жана миграция министрлиги балдардын фото- жана видеого тартылышында, анын ичинде шайлоо алдындагы иш-чараларда мыйзамдарды так сактоо зарылдыгын эскертти.

Ведомствонун маалыматына ылайык, балдардын сүрөттөрү жана видеолору мыйзамдуу өкүлдөрүнүн — ата-энеси, асырап алган адамдардын, камкорчуларынын жазуу түрүндөгү макулдугу менен гана колдонулушу мүмкүн. Бул талап балдардын жеке жана мүлктүк укуктарын коргоого, ошондой эле алардын образын саясий же коммерциялык максатта мыйзамсыз пайдалануунун алдын алууга багытталган.

Министрлик талапкерлерди, саясий партияларды, массалык маалымат каражаттарын жана агитация жүргүзгөн уюмдарды балдардын укуктарын коргоо боюнча мыйзамды так сактоого чакырды. Бул эрежелерди бузуу мыйзам менен каралган жоопкерчиликке алып келиши мүмкүн.