«Бишкек» эркин экономикалык зонасында заманбап ковролин жаап-каптоолорун чыгаруучу ишкана ишке киргизилди. Бул жаңы долбоорду «Орион Грант» ЖЧКсы ишке ашырып, дээрлик 4 миң чарчы метр аянттагы өндүрүш имаратын куруп бүттү жана Түркияда жасалган жогорку технологиялуу жабдууларды орнотту.

Долбоорго жалпы инвестиция көлөмү болжол менен 300 миллион сомду түзөт. Ошонун ичинен 1 миллион доллар Кыргыз-Азербайжан өнүктүрүү фонду тарабынан бөлүнүп, ишкананын ишке киришине маанилүү колдоо болду.

Заводдун ачылыш аземинде Улуттук инвестициялар агенттигинин директору Равшанбек Сабиров сөз сүйлөдү. Ал заманбап технологияларды киргизүү жана өндүрүштүк процесстерди туура уюштуруу өлкөнүн өнөр жай тармагы үчүн долбоордун маанилүүлүгүн арттырарын белгиледи.

Анын айтымында, мындай ишканалар Кыргызстанды региондук рынокто бекемдеп, экономикасынын кайра иштетүүчү (несырьевой) секторунун өсүшүнө кошумча мүмкүнчүлүктөрдү түзөт.

Ишкананын долбоордук кубаттуулугу айына 100 миң чарчы метрден ашык даяр продукция чыгарууга жетет. Биринчи этапта компания Борбор Азия жана ЕАЭБ өлкөлөрүнүн рыногуна багытталган төрт түрдөгү ковролин өндүрөт. Ишканада 30 жаңы жумуш орду түзүлдү.

БЭЗ «Бишкек»теги өндүрүш аянтынын ачылышы Кыргызстанда заманбап өнөр жайды өнүктүрүүгө багытталган бизнес, мамлекет жана эл аралык өнөктөштөрдүн ийгиликтүү кызматташуусунун мисалы болуп калды.