Европа биримдиги Global Gateway демилгесинин алкагында Борбор Азияга рекорддук 12 млрд евро салууга даяр экенин жарыялады. Бул тууралуу 26-ноябрда Ташкент шаарында өткөн ЕБ – Борбор Азия экономикалык форумуна катышып келген КРдын Кайра жаралуучу энергия боюнча ассоциациянын жетекчиси Кундус Кырбашева билдирди.

Инвестициялар аймактын өнүгүүсүнүн негизги багыттарына жумшалмакчы: транспорттук жана энергетикалык инфратүзүмдү өнүктүрүү, жашыл энергетика, санариптештирүү, суу ресурстары жана климат боюнча иш чаралар, ошондой эле жеке секторду өнүктүрүү жана стратегиялык маанидеги пайдалуу казындыларды казып чыгаруу тармактары.

Бирок негизги басым башка нерсеге жасалууда — Евробиримдик эрежелерди түп-тамырынан өзгөртүүдө. Мурдагыдай эки тараптуу жардам программаларынын ордуна эми аймак ичиндеги атаандаштыкка басым жасалат. Өлкөлөр үчүн өзүнчө квоталар каралган эмес: ким мыкты долбоор сунуштаса, каражат ошого берилет.

«12 млрд евра — бул аймактагы беш өлкөгө жалпы пакет. Кыргызстан өзүнө тарта ала турган каражаттын көлөмү түздөн-түз документтердин канчалык сапаттуу даярдыларына жана биз долбоорлорубузду канчалык профессионалдуу коргой аларыбызга көз каранды», — деп белгиледи Кырбашева.

Кадрдык тартыштык — жашыл энергетика үчүн башкы чакырык

Форумда Кыргызстан дагы бир маселени көтөрдү: жашыл энергетикага өтүү үчүн квалификациялуу кадрлардын курч тартыштыгы болууда. Лицейлердин бүтүрүүчүлөрү көп учурда заманбап технологияларды: күн панелдерин, шамал энергетикалык орнотуулары жана санариптик системаларды жетиштүү деңгээлде билбей чыгышат.

Ишкерлер кызматкерлерди кайрадан өздөрү окутууга мажбур болууда, бул тармактын өнүгүшүн жайлатууда.

Чечим катары катышуучулар Борбор Азиянын жашыл көндүмдөрдүн аймактык альянсын түзүүнү сунушташты: методикаларды, тренерлерди жана стажировкаларды бөлүшүү үчүн платформа катары кызмат кылган, жашыл экономиканын бирдиктүү кадр рыногун калыптандырган түзүм болору айтылды.

Кыргызстан сунуштаган долбоорлор

Кыргыз делегациясы эки долбоорду сунуштады:

• жашыл энергетика боюнча окуу борборун түзүү;
• агрардык сектордо кайра жаралуучу энергия булактарына негизделген автономдуу күнөсканаларды киргизүү.

КР өкүлдөрү адам капиталынын өнүктүрүлүшүн аймактын туруктуулугу жана келечектеги атаандаштыкка жөндөмдүүлүгү үчүн башкы шарттардын бири катары аташты.