Кыргыз-тажик мамлекеттик чек арасындагы абал туруктуу деп бааланууда. Бул тууралуу эки өлкөнүн чек ара ведомстволорунун биргелешкен кайрылуусунда айтылат.
Маалым болгондой, жетишилген макулдашууларды аткаруу жана бекемдөө, мүмкүн болуучу провокацияларды болтурбоо максатында Кыргызстандын чек ара ведомстволорунун жетекчилери Уларбек Шаршеев менен Тажикистан Ражабали Рахмонали менен жолугушуусу болуп өттү.
«Чек ара ведомстволорунун жетекчилери чек арадагы кырдаалды басаңдатуу боюнча өз убагында чараларды күчөтүү, эки мамлекеттин чек арачыларынын жүрүм-турум линиясын так сактоо зарылдыгын белгилешти.
Территориялык бүтүндүк жана чек аралардын кол тийбестиги маселелеринде өз ара урматтоо, тынчтыкта жанаша жашоо, жакшы коңшулук мамилелер жана тилектештик принциптерине бекем берилгендик ырасталды. Тараптар окуялардын алдын алуу боюнча мамлекеттер аралык комиссиянын ишмердүүлүгүнө объективдүү баа берип, чек арадагы көйгөйлөрдү тынчтык жолу менен жөнгө салууга өзгөчө көңүл бурулду», — деп айтылат маалыматта.
Ошондой эле тараптар чек арадагы кырдаалды жөнгө салууга жигердүү катышып жаткан биргелешкен жумушчу топтордун жолугушууларын өткөрүүнү макулдашканы маалымдалды.
Мамлекеттик чек араны аныктоо маселеси боюнча чечим кабыл алуу чек араны делимитациялоо жана демаркациялоо боюнча өкмөттөр аралык комиссиялардын өзгөчө укугу болуп саналат. Алардын ыйгарым укуктары ченемдик укуктук актылар менен аныкталат.
«Чек ара ведомстволорунун жетекчилери жалпыга маалымдоо каражаттарын, ошондой эле ыйгарым укуксуз адамдарды ар кандай комментарийлерден карманууга жана чыр-чатактын курчушуна жана элдерибиздин ортосундагы кастыкты козутууга алып келе турган билдирүүлөрдү жана жоруктарды жайылтпоого чакырат. Тараптар уруксатсыз билдирүүлөрдү эки өлкөнүн чек арасындагы кырдаалды туруксуздаштыруу аракети катары баалашат», — деп айтылат билдирүүдө.
Телеграм каналыбызга катталыңыз
