Бишкек шаардык сотунда 9-10-ноябрда «массалык башаламандыктарга даярдык көрүүгө» шектелип кармалган саясатчы, укук коргоочу жана активисттердин баш коргоо чараларын өзгөртүү боюнча жактоочулардын арызы каралды.
Сот алардын кармалышын мыйзамдуу деп таап, 20-декабрга чейин камакта калтырды:
— Конституциялык соттун экс-судьясы Клара Сооронкулова,
— БШКнын экс-мүчөсү Гүлнара Журабаева,
— Жогорку Кеңештин экс-депутаты Равшан Жеенбеков,
— Жогорку Кеңештин экс-депутаты Асия Сасыкбаева,
— Жогорку Кеңештин экс-депутаты Кубанычбек Кадыров,
— Коопсуздук кеңешинин экс-катчысы Кеңешбек Дүйшебаев,
— Жалал-Абад облусунун экс-губернатору Бектур Асанов,
— активист Перизат Суранова,
— укук коргоочу Рита Карасартова,
— блогер Али Шабдан,
— активист Улугбек Маматаев,
— жарандык активист Айбек Бузурманкулов.
Эскерте кетсек, 22-октябрда Кемпир-Абад суу сактагычын коргоо комитети түзүлгөн. Анын курамына активисттер, саясатчылар жана депутаттар кирген. 23-октябрда массалык тинтүү иштери башталып, 20дан ашык адам кармалып, алар 48 саатка камалган.
24-октябрда Бишкек шаарында Кемпир-Абад суу сактагычынын астындагы жердин Өзбекстанга берилишине жана активист, саясатчылардын камалышына каршы жөө жүрүш өткөн. 25-октябрда Биринчи май райондук соту тарабынан алар эки айга камакка алынган.
Активист жана саясатчылардын камалышы боюнча ИИМ түшүндүрмө берип, Кылмыш-жаза кодексинин 36-278-беренеси «Массалык баш аламандыктарды уюштурууга даярдануу» менен козголгон кылмыш иши боюнча тергөө амалдары жүргүзүлүп жатканын билдирген.
Биздин Телеграм каналга катталыңыз