Август айы аяктап, сентябрь кирип босогодо турат. Аны менен бирге күз мезгили кирип келет. Күз жаратылыш жаңы өңгө бөлөнгөн учур. Салкын аба ырайы, саргайган жалбырактар, мелүүн шамал… Бул табигый кооздук кээде жан дүйнөнү тынчтандырса, кээде тескерисинче көңүлдү чөгөрүп, энергияны соруп салгандай сезилиши мүмкүн. Эгер эртең менен ойгонуу кыйын болуп, күнү бою чарчоо жана тажоо менен коштолуп жатса демек, күзгү депрессияга кабылган болушуңуз мүмкүн. “Reporter.kg” андан чыгуу үчүн бир катар кеңештер топтомун түздү.

Денеңизге кам көрүү уйкудан башталат

Толук кандуу түнкү эс алуу мээни сергитет, маанайды көтөрөт жана күндүк активдүүлүктү сактоого жардам берет. Ар күнү белгилүү убакта жатып, эртең менен ошол эле убакта турууну адатка айлантыңыз.

Жарыкты мүмкүн болушунча көп пайдаланыңыз

Күзгү күн кыска болсо да, табигый жарыкка чыгып туруңуз. Жөө басуу, токой аралоо, паркта сейилдөө булар жөн гана сергек абада жүрүү эмес, маанай үчүн дарыдай.

Үйүңүздү “жарык сезимдерге” толтуруңуз

Жашоочу мейкиниңизге күн нурундай жарык алып келүү үчүн жумшак, бирок күчтүү чырактарды колдонуп, таң эртең менен бөлмөңүздү жарыктандырууну унутпаңыз.

Кийимиңиз менен маанайыңызды жандантыңыз

Көптөр кышка жакын боз, күңүрт түстөргө өтүшөт. А сиз болсо тескерисин жасап көрүңүз. Кызгылт сары, кочкул сары, ал тургай ачык кызыл өңдөр күздүн муздак өңүнө каршы жылуулук тартуулайт.

Күздүн кооздугун аңдап үйрөнүңүз

Сизди курчап турган дүйнөгө башкача көз караш менен караңыз. Жапжашыл дүйнө алтын жалбыракка боёлду. Муну көрүүгө жана сезүүгө убакыт бөлүңүз. Үйүңүзгө кичинекей күзгү детальдарды кошуп, мейкиндикке жылуулук тартуулаңыз.

Денени кыймылдат — жан дүйнөң жандансын

Таңкы жеңил көнүгүүлөр, жумшак стрейчинг же жөө басуу сиздин физикалык энергияны гана эмес, психологиялык сергектигиңизди да арттырат.

Ашказан – экинчи мээ

Күздө витаминдерге бай, жандуу азыктарды көбүрөөк жегиле: сабиз, алма, ашкабак, капуста, жаңгак. Тамак сизге күч, мээңизге шайдоот маанай тартуулайт.

Күлкү – жан дүйнөнүн дарысы

Күлгөн адам стресске аз кабылат. Күлкү достук мамилени бекемдейт, иммунитетти көтөрөт. Комедия көрүңүз, тамаша уккула, өзүңүз да жеңил тамашаларды айтып көнүңүз.

Күнүмдүк жашооңузду “жаңыртыңыз”

Жаңы бир нерсени үйрөнүү, башка чөйрөдө болуу, жашоо темпин өзгөртүү – мунун баары мээни стимулдайт. Мүмкүн болсо, курска жазылыңыз же жаңы хобби тапкыла.

Энергияңызды текке кетирбеңиз

Күз күч топтой турган маал. Аны талаш-тартышка, терс адамдарга коротпоңуз. Өзүңүздү түшүнгөн, сизге жылуу мамиле кылган адамдар менен болуңуз. Психикалык жыргалчылык сиздин бакубат жашооңуздун негизи.

Күз — бул жоготуу эмес, кайрадан ичинен гүлдөп чыгуунун маалы болушу мүмкүн. Эгер өзүнө кам көрүп, көңүл бура билсең, бул мезгил да өзүң үчүн жаңылануунун башталышы болуп берет.