Өзбекстандын борбору Ташкент шаарында синтетикалык баңгизаттарды жана жаңы психоактивдүү заттарды аныктоо, ошондой эле отчеттуулук менен сапатты көзөмөлдөөнүн жаңыланган стандарттарын колдонууга арналган регионалдык окуу семинары өттү.

Ага Борбор Азия мамлекеттеринен келген адистер, анын ичинде КР Юстиция министрлигине караштуу Соттук-эксперттик кызматынын КЭМВИ бөлүмүнүн башкы эксперти Марина Сатарова катышты.

Семинар Өзбекстандын Борбордук бажы лабораториясынын базасында уюштурулду. Дәристерди Италиянын жана Литванын эксперттери, ошондой эле Борбор Азия аймактык маалыматтык-координациялык борборунун адистери өтүштү.

Иш-чаранын негизги максаты — Кыргызстан, Казакстан, Өзбекстан, Түркмөнстан жана Тажикстан ортосунда жаңы коркунучтуу заттар тууралуу өз убагында маалымат алмашуунун туруктуу механизмин түзүү. Бул — баңгизаттын жаңы түрлөрүн тез аныктоого жана алардын жайылышына ыкчам чара көрүүгө жардам берет.
Программа теориялык жана практикалык блоктордон турду. Катышуучулар төмөнкү багыттар боюнча билим алышты:

• жаңы психоактивдүү заттарды талдоонун заманбап ыкмалары;
• баңгизат каражаттарын профилдөө — иликтөөнү күчөтүүнүн натыйжалуу жолу катары;
• соттук-химиялык лабораториялар үчүн эл аралык сапат стандарттары;
• сандык анализдин негиздери: калибровка ийри сызыктарын түзүү, методикаларды валидациялоо.
  Практикалык сабактар Agilent 7890 жана Shimadzu масс-спектрометрдик детекторлору бар газдык хроматографтарда өттү. Ошондой эле катышуучулар тетрагидроканнабинолду сандык аныктоо боюнча көндүмдөрдү бекемдешти.
• 
  Семинар соңунда бардык адистерге эл аралык деңгээлде таанылган сертификаттар ыйгарылды.