Бишкек. «Росатом» мамлекеттик корпорациясынын башчысы Алексей Лихачёв Кыргызстан чакан кубаттуулуктагы атомдук электростанция куруу долбоорун ишке ашырууга кызыкдар экенине ишенимин билдирди.

Анын айтымында, республика учурда сунуштарды изилдөө этабында турат. Алардын ичинде 300 МВттан жогору кубаттагы модулдук станция куруу жана аны жайгаштырууга мүмкүн болгон аянттарды аныктоо каралууда.

«Бул жерде сейсмикалык активдүүлүк бар, бирок биз бул боюнча иштей билебиз. Кыргызстанда мындай станция ишке киргенде, бул бүтүндөй экономиканын өнүгүшүнө күчтүү түрткү берет — энергия менен камсыздоодо да, кадрларды даярдоодо да, билим сапатын жогорулатууда да, жаңы жумуш орундарын түзүүдө да. Ойлойм, бул чечим алыс эмес», — деди Алексей Лихачёв.

Ал «Росатом» Кыргызстандагы долбоорлорду колдоону шыктануу менен кабыл аларын белгиледи. Корпорациянын республикадагы негизги багыты — мурдагы уран кендерин рекультивациялоо. Келечекте шамал электр станцияларын өнүктүрүү, чакан атомдук электростанция куруу жана заманбап ядролук медицина борборун түзүү долбоорлору да пландалууда.