Эгер сиз ишкердикти токтотууну чечсеңиз, жөн эле иштебей коюу жетишсиз. Айып пулдардан жана карыздардын чогулуп калуусунан качуу үчүн, жеке ишкердикти (ЖИ) расмий түрдө жабуу керек. Мамлекеттик салык кызматы (МСК) муну кантип туура жасоону түшүндүрдү.

1-кадам. Документтерди чогултуңуз

Сиз жеке ишкер катары катталган жериңиз боюнча салык органына кайрылып, төмөнкү документтердин топтомун тапшырышыңыз керек:

• Ишмердүүлүктү токтотуу жөнүндө арыз.
• Каттоону жокко чыгарууга арыз (DOC STI-164 формасы).
• Паспорт (өздүктү тастыктоочу документ).
• Салыктар жана камсыздандыруу төгүмдөрү боюнча жоюу отчеттору.
• Бирдиктүү салык декларациясы (эгер аны тапшырууга милдеттүү болсоңуз).

2-кадам. ККМ маселесин чечип алыңыз

Эгер сиз Көзөмөл-кассалык машинаны (ККМ) колдонгон болсоңуз:

• Аны каттоодон чыгарыңыз.
• Салыкчыларга Техникалык тейлөө борборунан (ТТБ) ККМдин каттоодон чыгарылгандыгы тууралуу маалымкатты бериңиз.

3-кадам. Чечимди күтүңүз

Документтерди тапшыргандан кийин салык кызматы текшерүүнү («камералдык») баштайт:

• Сиздин отчеттуулукту жана каражаттардын кыймылын текшеришет.
• Эгер карыздар жана тобокелдиктер жок болсо — 15 жумушчу күндүн ичинде ЖИни жоюу жөнүндө чечим чыгарып, аны колуңузга беришет.

Маанилүү: Эгер салык кызматы тобокелдиктерди (төлөнбөгөн салыктар, каталар) көрсө, сизге көчмө текшерүү дайындалышы мүмкүн. Жеке ишкердикти жабуу жөнүндө чечим ал аяктагандан кийин гана кабыл алынат.

Бирдиктүү салык декларациясын тапшыруу керекпи?

• Ооба, эгер сиз жалпы режимде же жөнөкөйлөтүлгөн системада (кадимки чендер менен бирдиктүү салык) иштеген болсоңуз.
• Жок, эгер мыйзам боюнча декларация тапшыруудан бошотулган болсоңуз.

ЖИни жабууда кимдер декларация тапшыруудан бошотулган:

• Базарларда иштегендер (өзгөчө режимдеги соода зоналары).
• 0%, 0,1%, 0,5% жана 1% чендер менен бирдиктүү салык төлөөчүлөр.
• Патент менен иштегендер.
• Дыйкан жана фермердик чарбалар (юридикалык жак түзбөстөн).

Муну билүү пайдалуу

• Эски жеке ишкердикти расмий жапмайынча, жаңысын ачуу мүмкүн эмес.
• Эгер сизде ишмердүүлүк болбосо жана отчет үчүн маалыматтар жок болсо, жабуу учурунда нөлдүк отчетторду тапшыруунун кереги жок (декларациядан тышкары).
• МСК бюджет алдында милдеттенмелер чогулуп калбашы үчүн процедураны создуктурбоону сунуштайт.