«Кыргыз почтасы» ААК эпистолярдык жанрдагы дилбаяндардын эл аралык сынагына катышуу үчүн билдирмелерди кабыл алуу башталганын жарыялады. Чыгармачылык таймаш Бүткүл дүйнөлүк почта союзунун демилгеси менен өткөрүлүүдө.

Сынакка 9 жаштан 15 жашка чейинки мектеп окуучулары чакырылат. Быйылкы жылы катышуучуларга технологиялардын тез өнүгүшү шартында адамдар ортосундагы байланыштардын мааниси тууралуу ой жүгүртүү сунушталды. Катышуучулар санариптештирүү доорундагы жандуу баарлашуунун баалуулугун ачып берип, досуна кат жазышы керек.

Уюштуруучулар иштерди тариздөө боюнча катуу талаптарды белгилешти:

• текст кол менен гана жазылышы керек;
• дилбаянды даярдоодо жасалма интеллект технологияларын колдонууга тыюу салынат.

Сынакка иштерди кабыл алуу 10-апрелге чейин уланат.

Улуттук тандоонун жыйынтыгы боюнча жеңүүчүлөр аныкталып, алар баалуу белектер: ноутбуктар, заманбап смартфондор жана планшеттер менен сыйланышат.

Кыргыз Республикасынан эң мыкты деп табылган дилбаяндын автору өлкө намысын сынактын эл аралык этабында коргоо мүмкүнчүлүгүн алат. Финалдык турдун башкы байгеси — Швейцарияга саякат болмокчу.