Финансы министри Алмаз Бакетаев өлкөнүн каржы тутумунун 2025-жылдагы ишмердүүлүгүнүн жыйынтыгын чыгарды. Отчетко ылайык, өткөн жыл мамлекеттик кирешелердин олуттуу өсүшү жана бюджеттик туруктуулуктун бекемделиши менен мүнөздөлдү.

Негизги каржылык көрсөткүчтөр:

• Консолидацияланган бюджеттин ресурстары 1 093,1 млрд сомго жетти, бул мурунку жылдын көрсөткүчтөрүнө караганда 384,2 млрд сомго же 54,2%га көп.
• Республикалык бюджеттин көлөмү 939,0 млрд сомду түзүп, бекитилген пландан 352,9 млрд сомго ашты.
• Салыктык кирешелер 49,9 млрд сомго көбөйүп, пландын аткарылышын 113,8%га камсыздады.
• Салыктык эмес кирешелер эселеп өсүүнү көрсөттү — өткөн мезгилдеги 56,2 млрд сомдон 2025-жылы 172,4 млрд сомго чейин.

Министр оң динамика өндүрүш, соода жана кызмат көрсөтүү чөйрөлөрүндөгү ички экономикалык жигердүүлүктүн күчөшү менен шартталганын белгиледи. Ресурстардын өсүшүнүн негизги факторлору катары каржы секторуна санариптик инструменттерди киргизүү, бюджеттик саясаттын ачык-айкындуулугун жогорулатуу, ошондой эле салык жана бажы башкаруусун жакшыртуу саналды.

Алмаз Бакетаев 2026-жылга карата артыкчылыктуу милдеттер катары экономикалык туруктуулукту сактоону, мамлекеттик ресурстарды башкаруунун натыйжалуулугун мындан ары да жогорулатууну жана жарандардын кызыкчылыгы үчүн салмактуу каржы саясатын улантууну белгиледи. Финансы министрлигинин башчысынын айтымында, өлкө жаңы жылга туруктуу каржы базасы жана өнүгүү үчүн жаңы мүмкүнчүлүктөр менен кирүүдө.