6-февралда КР Мамлекеттик салык кызматында (МСК) коллегиялык жыйын болуп, анда мекеменин 2025-жылдагы ишинин жыйынтыктары айтылды. Иш-чарага Министрлер Кабинетинин төрагасы Адылбек Касымалиев жана Салык кызматынын төрагасы Алмамбет Шыкмаматов катышты.

Рекорддук көрсөткүчтөр

2025-жылдын жыйынтыгы боюнча Салык кызматы бюджетке түшүүлөрдүн олуттуу өсүшүн көрсөттү:

• Салыктар жана төлөмдөр: 308,4 млрд сом чогултулду. Бул бекитилген пландан 40,1 млрд сомго көп. 2024-жылга салыштырмалуу өсүү темпи 135,1%ды, ал эми таза өсүш 80,2 млрд сомду түздү.
• Жалпы жыйымдар (салыктар + камсыздандыруу төгүмдөрү): 391,8 млрд сомду түзүп, такталган план 102,1%га аткарылды. Мурунку жылга салыштырмалуу жалпы өсүш дээрлик 90 млрд сомго жетти.

Салык кызматынын жетекчиси Алмамбет Шыкмаматов мындай жыйынтыкка салык ставкаларын көтөрбөстөн жетишилгенин баса белгиледи. Кирешелердин өсүшү бизнести көмүскөдөн чыгаруу жана башкарууну (администрлөөнү) жакшыртуунун эсебинен камсыздалды.

Өткөн жыл мекемени трансформациялоо баскычы болуп калды: Салык кызматы фискалдык кысымдан санариптештирүүгө жана ишенимге негизделген сервистик моделге өттү. Негизги өзгөрүүлөр төмөнкүлөр болду:

• Ашыкча текшерүүлөрдөн баш тартуу жана отчеттуулукту жөнөкөйлөтүү.
• «Салык Күзөт» жаңы салыктык талдоо тутумун киргизүү. Ал ачык экономиканы түзүүгө, салыктык тобокелдиктерди азайтууга жана адамдык факторду минималдаштырууга багытталган.
• Акциздик (алкоголдук) продукциянын мыйзамсыз жүгүртүлүшүнө каршы жигердүү күрөш.

Министрлер Кабинетинин төрагасы Адылбек Касымалиев кызматтын ишине оң баа берип, пландын ашыгы менен аткарылышы салык реформаларынын жана санариптик сервистерди киргизүүнүн натыйжалуулугун тастыктай турганын белгиледи.

2026-жылга пландар

Салык кызматы үстүбүздөгү жыл үчүн артыкчылыктуу багыт катары төмөнкүлөрдү аныктады:

• Башкарууда тобокелдикке багытталган аналитикага өтүү.
• Салык төлөөчүлөрдү тейлөөнүн сервистик моделин андан ары өнүктүрүү.
• Карыздарды өндүрүүнүн натыйжалуулугун жогорулатуу.
• Санариптик тутумдарды заманбапташтыруу жана кадрлардын квалификациясын жогорулатуу.

Мекеменин стратегиялык максаты — реформаларды бекемдөө жана жаңы типтеги — ачык жана технологиялык салык кызматын биротоло калыптандыруу.