10 000 метр бийиктикте маалымдуулук: «Манас» эл аралык аэропорту БУУнун Баңгизаттар жана кылмыштуулук боюнча башкармалыгы (УНП БУУ) жана улуттук өнөктөштөр менен биргеликте Баңгизаттарга каршы күрөшүүнүн эл аралык күнүн белгиледи.
Бул күндүн урматына БУУнун Баңгизаттар жана кылмыштуулук боюнча башкармалыгы Кыргыз Республикасынын УКМКнын Чек ара кызматы жана «Манас» эл аралык аэропортунун авиациялык коопсуздук кызматы менен кызматташтыкта жүргүнчүлөр үчүн бир күндүк маалыматтык кампания өткөрдү.
Күн бою аэропорт аркылуу өткөн жүргүнчүлөргө дүйнөлүк кампаниянын негизги билдирүүлөрүн камтыган маалымат баракчалары таратылды. Алар баңгизаттар менен байланышкан көйгөйлөрдү чечүүдө саламаттык сактоого жана адам укуктарын сактоого багытталган ыкмаларды колдонуу маанилүү экенин баса белгиледи. Бул иш-чара коомчулуктун баңгизаттардын мыйзамсыз жүгүртүлүшүнүн зыяндары жана ага каршы эл аралык кызматташуунун мааниси жөнүндө маалымдуулугун жогорулатууга багытталган.
Кампаниянын таасирин күчөтүү максатында Баңгизаттарга каршы күрөш күнүнө арналган видеоролик аэропорттун бардык монитору аркылуу көрсөтүлүп, ички жана эл аралык каттамдардагы миңдеген жүргүнчүлөрдү камтыды.
Ошондой эле УКМКнын Чек ара кызматынын жана авиациялык коопсуздук кызматынын кызматкерлери үчүн кыскача презентациялар өткөрүлүп, БУУнун баңгизаттарды көзөмөлдөө боюнча үч эл аралык конвенциясынын мааниси жана аткарылышы тууралуу айтылып, кызматкерлердин улуттук жана эл аралык баңгизат саясатын камсыздоодогу ролу белгиленди.
Бул демилге УНП БУУ менен Кыргызстандын мамлекеттик органдарынын ортосундагы туруктуу өнөктөштүктү көрсөтүп, баңгизат колдонуунун алдын алуу, калктын маалымдуулугун жогорулатуу жана эл аралык укук менен саламаттыкты сактоо принциптерине ылайык чек аралардагы коопсуздукту чыңдоого багытталган.
