КР УКМК насыялар, кыймылсыз мүлк жана курулуш долбоорлоруна байланыштуу көп миллиондук көз боемочулуктар боюнча резонанстуу ишти тергеп жатат. Бул тууралуу мамлекеттик комитеттин төрагасы Камчыбек Ташиевдин жабырлануучулар менен болгон жолугушуусунун жыйынтыгында белгилүү болду. Жолугушуу УКМКнын штаб-кеңсесинде өттү. Ага иш боюнча кармалган, масштабдуу алдамчылык аракеттерге шектелип жаткан жаран С.М. да катышты.

Тергөөнүн маалыматы боюнча, С.М. узак убакыт бою өтө оор шарттарда насыя берип, мыйзамсыз күрөөкана жана сүткордук ишмердүүлүгү менен алектениши мүмкүн болгон. Андан кийин жарандардын мүлкү жалган бүтүмдөр аркылуу тиешеси бар адамдарга катталып, натыйжада менчик иш жүзүндө тартылып алынганы айтылууда. Тергөө «Эксперт Строй» ЖЧКсынын («Жибек Жолу» турак жай комплекси) жана «Арз Девелопмент» ЖЧКсынын курулуш долбоорлоруна өзүнчө көңүл бурууда. Тергөөнүн версиясы боюнча, бул кейстерде курулушту токтотуу жана акча талап кылуу аракеттери аныкталган. Иш боюнча 89 үлүшчү, ошондой эле бир катар жеке адамдар жабырлануучу деп табылды.

Жолугушууда Камчыбек Ташиев өлкөдөгү бардык күрөөкана компанияларын толук текшерүү зарылдыгын өзүнчө билдирди. Анын айтымында, текшерүүлөр салык кызматынын жана Улуттук банктын кызматкерлери менен биргеликте жүргүзүлүшү керек. УКМК башчысы пайыздар боюнча катуу чек коюуну талап кылды — насыялар боюнча 30%дан ашпашы керек.

«Эгер кимдир бирөө 30 пайыздан ашык алып жатса, эгер кимдир бирөөнүн мүлкүн тартып алышса — баарын кайтарып берүү зарыл», — деп баса белгиледи ал.

Ташиев күрөөкана ээлери мыйзам чегинде гана иштеши керектигин, ал эми мамлекет жарандар жапа чеккен кыянатчылыктарга көз жумуп койбой турганын белгиледи.

«Адамдар унаа, мүлк сатып алып, насыя алып жатышат — эмне үчүн биз бул ээнбаштыкты карап турушубуз керек? Биз элибиз жапа чекпеши үчүн ушул жердебиз», — деп билдирди ал.

УКМК тергөө иштери мекеме төрагасынын жеке көзөмөлүнө алынганын маалымдады. Тергөөчүлөргө бардык катыштыгы барларды аныктоо, күрөөканалардын ишин текшерүү жана жабырлануучуларга келтирилген зыяндын ордун максималдуу түрдө толтурууну камсыздоо тапшырылды. Ошондой эле күрөөканалар чөйрөсүндө тартип орнотуу иштин артыкчылыктуу багыттарынын бири болору белгиленүүдө.