Никарагуа Евразиялык экономикалык биримдикте (ЕАЭБ) байкоочу мамлекет макамын алуу маселесин карап жатат. Бул кадам өлкөнүн соода-экономикалык диалогду активдештирүүгө умтулуп жатканын тастыктайт. Бул маселе ЕЭКтин интеграция жана макроэкономика боюнча министри Эльдар Алишеров менен Никарагуанын Президентинин кеңешчиси Лауреано Ортега Мурильонун жолугушуусунда талкууланды. Сүйлөшүүлөр Минскиде өткөн Евразиялык экономикалык форумдун алкагында болду.
Тараптар ЕАЭБге мүчө мамлекеттер менен Никарагуанын ортосундагы байланыштарды кеңейтүү жана соода көлөмүн көбөйтүү ниеттерин ырасташты. Бул аракеттер 2024-жылы кол коюлган Өз ара аракеттенүү жөнүндө меморандумга негизделет.
Эльдар Алишеров белгилегендей, соода жүгүртүүнү арттыруу үчүн коммерциялык мүмкүнчүлүктөр жана ишкердик жүргүзүү шарттары тууралуу маалыматтардын жетишсиздигин жоюу зарыл. Анткени кызматташтыктын негизги кыймылдаткычы – бул ишкер чөйрө.
Кийинки этапта биргелешкен жумушчу топ техникалык жөнгө салуу, фармацевтика жана санариптештирүү маселелерине көңүл бурат. Бул багыттар, айрыкча, географиялык алыстыкты эске алганда, өтө актуалдуу болуп саналат.
Биргелешкен жумушчу топтун кезектеги жыйыны 2025-жылдын аягына пландалууда.
