Пара талап кылуу фактысы боюнча Ноокен райондук ички иштер бөлүмүнүн тергөөчүсү кармалды. Бул тууралуу Улуттук коопсуздук мамлекеттик комитетинен билдиришти.
Маалыматка ылайык, 27-мартта 12 миң сом пара алып жаткан Ноокен районунун ички иштер бөлүмүнүн тергөө кызматынын тергөөчүсү, милициянын капитаны Р.у.И.ни жана Э.К. аттуу жаранды кармады.
Алар Жалал-Абад облусунун Ноокен районундагы Маасы айылында майда бейбаштык фактысы боюнча жашы жете элек кызга жана анын тууганына карата козголгон кылмыш иши боюнча оң чечим чыгарып берүүнү убадалашкан.
Шектүүлөр 326-берененин 1-бөлүгү (Пара талап кылуу) менен айыпталууда.
Учурда УКМК тарабынан ыкчам тергөө иштери уланып жатканы айтылат.
