Министрлер кабинетинин төрагасы Адылбек Касымалиев Нарын облусуна болгон иш сапарынын алкагында «Торугарт» көзөмөл-өткөрүү пунктуна жана «Торугарт-1» көмүр тилкесине барып келди.

Өкмөт башчы оңдолуп-түздөлүп, кайра пайдаланууга берилген жөө жүргүнчүлөрдү тейлөө пунктун көрүп чыгып, андан соң «Чатыр-Көл» чек ара кызматынын бөлүгүнө барып, аскер кызматкерлеринин шарттары менен таанышты.

Иш сапардын жүрүшүндө Касымалиев 12-ноябрдан тарта иштетиле баштаган «Торугарт-1» көмүр тилкесине дагы барды. «Кыргызкөмүр» ААК Ат-Башы районундагы 557,6 гектар аянтта чалгындоо жүргүзүү боюнча лицензияга ээ.

Учурда иштетилип жаткан аймак 25 гектарды түзүп, көмүр запасы 423,4 миң тонна деп бааланган. Бүгүнкү күндө болжол менен 10 миң тоннадай көмүр казылып алынган.

Министрлер кабинетинин төрагасы тилкенин туруктуу иштешин камсыздоону жана казылып алынган көмүрдү экспортко даярдоо иштерин ылдамдатууну тапшырды.