Орусия президентинин басма сөз катчысы Дмитрий Песков Москва Кыргызстандан барган эмгек мигранттары үчүн процедураларды жөнөкөйлөтүүгө даяр экенин билдирди. Бул тууралуу ал ЖККУ саммитинин алкагында, Орусияда иштеген кыргызстандыктардын абалы тууралуу комментарий берип жатып айткан.

Песковдун айтымында, азыр Орусияда Кыргызстандын 500 миңден ашык жараны эмгектенет жана алардын статусуна байланышкан маселелер дайыма эки тараптуу мамилелердин күн тартибинде турат. Ал кечээ Орусиянын ички иштер министри орус-кыргыз сүйлөшүүлөрүнө катышканын, анда мигранттардын жүрүүсүн тартипке келтирүү чаралары талкууланганын эске салды.

Песков Орусия ЕАЭБ принциптерин сактоого жана ошол эле учурда миграция чөйрөсүндө тартип орнотууга умтуларын баса белгиледи.

«Эң башкысы — алар үчүн бардык мыйзамдуу талаптарды аткаруу мүмкүн болушунча жеңил болушу керек», — деди ал.

Ошол эле учурда ал он миңдеген мигранттар азыркыга чейин талаптагыдай каттоодон өтпөй жатканын белгиледи. Бул маселени чечүү боюнча Москва менен Бишкек биргелешкен ишин улантып жатышат.

«Ооба, маселе бар, бирок аны ашкере чоңойтуп кереги жок. Бул жерде эки тарап тең аракет кылышы керек», — деди Песков.

Эске салсак, бүгүн президенттик администрациянын «Ынтымак Ордо» имаратында ОДКБ саммити өтүп жатат. Ага уюмга мүчө өлкөлөрдүн лидерлери Владимир Путин (Россия), Касым-Жомарт Токаев (Казакстан), Александр Лукашенко (Беларусь) жана Эмомали Рахмон (Тажикстан) катышууда.

Орусиянын президенти Владимир Путин 25-ноябрда чоң делегация менен Кыргызстанга келген, калган президенттер 26-ноябрда учуп келип, аларга «Кыргыз айылы» этнокомплекси — боз үйлөр, кол өнөрчүлүк, улуттук турмуш жана жандуу музыка көрсөтүлгөн.