Инвестициялар боюнча улуттук агенттиктин директору Равшанбек Сабиров Кара-Суу районунун Кашкар-Кыштак айылында жайгашкан «Евразия Групп» компаниясынын тигүү фабрикасына жумушчу сапары менен барды. Сапардын максаты – бардык өнүктүрүү баскычтарын эске алуу менен жалпы салымдардын көлөмү 40 млн АКШ долларын түзгөн инвестициялык долбоордун экинчи этабын ишке ашыруу жүрүшү менен таанышуу болду.

Ишкананы кеңейтүүнүн учурдагы этабы кошумча тигүү цехтерин курууну жана жогорку технологиялуу кездеме боёочу өндүрүштү ишке киргизүүнү шарттайт. Модернизациялоонун негизги максаты – республикада текстиль кездемесин чыгаруудан тартып даяр буюмдарды тигүүгө чейинки толук өндүрүштүк циклди түзүү. Бул демилгени ишке ашыруу жеңил өнөр жайдагы локализация деңгээлин олуттуу жогорулатууга жана ата мекендик өндүрүүчүлөрдүн кездеме импортуна болгон көз карандылыгын азайтууга мүмкүндүк берет.

Өнөр жай дараметинен тышкары, долбоор айкын социалдык натыйжага ээ. Фабриканын кубаттуулугун кеңейтүү 600дөн ашык жаңы жумуш орундарын түзүүнү камсыздайт. Бул Ош облусунун социалдык-экономикалык өнүгүүсүнө кошулган олуттуу салым болуп калмакчы.

Объектти кароонун жүрүшүндө Равшанбек Сабиров өлкөнүн өнөр жай секторун чыңдоо үчүн долбоордун стратегиялык маанисин белгиледи. Ал Улуттук агенттик инвесторлорго ар тараптуу колдоо көрсөтүүнү улантарын жана аймактарды индустриялаштырууга, Кыргызстандын экспорттук дараметин арттырууга багытталган демилгелерди ыкчам коштоону камсыздарын баса белгиледи.