Ош шаарына президент Садыр Жапаровдун атынан тапшырылган жаңы интерактивдүү панелдердин партиясы жеткирилди. Заманбап жабдуулар Х. Абдуллаев атындагы №41 мектепке жана Федченко атындагы №1 мектепке берилди. Жалпы баасы 12,4 млн сомду түзгөн бул партиянын алкагында билим берүү мекемелерине 62 панель таратылды. Бул тууралуу шаар мэриясынын басма сөз кызматы билдирди.

Жабдууларды мектептерге түштүк борбордун мэри Жеңишбек Токторбаев тапшырды. Ал мындай колдоо мугалимдердин мүмкүнчүлүктөрүн кеңейтип, заманбап билим берүү стандарттарына жооп берерин баса белгиледи. Анын айтымында, мугалимдердин ишин жеңилдетип, окуу процессин кызыктуу кылган техника менен мектептерди камсыз кылуу мэриянын приоритеттүү багыттарынын бири бойдон калат.

Муниципалитет президенттин атынан мектептерди заманбап жабдуулар менен камсыз кылуу программасы мындан ары да улантыларын билдирди.