Кыргыз Республикасынын Президенти Садыр Жапаров Минск шаарында өткөн Жогорку Евразиялык экономикалык кеңештин жыйынына катышты.
Жыйындын алкагында күн тартибиндеги 14 маселе каралып, ЕАЭБге мүчө мамлекеттер ортосундагы экономикалык кызматташууну тереңдетүүгө багытталган бир катар көп тараптуу документтерге, анын ичинде ЕАЭБ жөнүндө келишимге өзгөртүүлөрдү киргизүү боюнча “IV Улуу” протоколуна кол коюлду.
Евразиялык экономикалык биримдик иштеп баштагандан бери:
- мүчө мамлекеттердин жалпы ички дүң продукциясы (ИДП) 18%га өсүп, 2,5 триллион АКШ долларынан ашты;
- Кыргыз Республикасынын реалдуу ИДПсы 56%га өстү;
- ЕАЭБ өлкөлөрү менен соода жүгүртүү 2 эсеге көбөйдү;
- өнөр жай өндүрүшү 54%га, ал эми айыл чарба продукциясынын көлөмү 30%га артты.
Кыргызстандын ЕАЭБдеги активдүү катышуусу улуттук экономиканын өнүгүүсүнө жана интеграциялык потенциалды пайдаланууга өбөлгө түзүүдө.
