Президент Садыр Жапаров Бишкекте ачылган «Евразия» оюн-зоок паркы заманбап эс алуучу жай гана эмес, балдардын жашоосун жакшыртууга багытталган социалдык долбоор экенин билдирди. Бул тууралуу Президенттик администрация кабарлады.

Мамлекет башчысы паркка 35 млн доллар инвестиция салган «Евразия» уюмуна ыраазычылык билдирди.

«Оюн-зоок паркы үй-бүлө баалуулуктарын бекемдөөгө, жарандардын бош убактысын үй-бүлөсү менен чогуу кызыктуу өткөрүүгө жана борбордун тургундары менен конокторуна массалык эс алууга кызмат кылат. Паркка кирип, аттракциондордо ойноо 5 жаштан 15 жашка чейинки балдар үчүн акысыз болот. Себеби социалдык жактан бөлүнбөй, бардык наристелер паркта бирдей ойносун деген максатты койдук», — деди Жапаров.

Президент эс алуучуларды аттракциондорго зыян келтирбестен, аларга өз буюмундай мамиле кылууга чакырды.