Эмгек жана социалдык өнүгүү министри Улукбек Кочкоров жана Жогорку Кеңештин төрагасы Дастан Жумабеков Чүй облусунун Сокулук районунда ден соолугунун мүмкүнчүлүгү чектелген адамдарга турак-жайдын курулушуна капсула салышты. Бул тууралуу аталган министрликтин маалымат кызматынан билдиришти.
Үйдүн курулушуна айыл өкмөт жер тилкесин бөлүп берген.
«Ассанабил» кайрымдуулук фонду үч кабаттуу үйдүн курулушун баштады. Бул турак-жай Чүй облусунун жаш майыптар коомунун мүчөлөрүнө курулат», — деп коомдун жетекчиси Эрнис Мыктыбек уулу айтты.
Анын айтымында, бул имаратта атайын тигүүчү, устакана цехтери жана окутуу борбору жайгашат.
Иш-чаранын алкагында жеке ишкер Улан Жусупов өзүнүн 2 кабаттуу үйүн майыптар коомуна белек кылды.
Министр өз сөзүндө демөөрчүлөргө терең ыраазычылык билдирип, алардын демилгеси менен Кыргызстанда бир топ ийгиликтүү долбоорлор ишке ашып жатканын баса белгиледи.
