Ысык-Көл районунун сот аткаруучусу алдамчылыкка шектелип кармалды. Бул тууралуу облустук милициядан билдиришти.
Маалыматка ылайык, 2020-жылдын 31-октябрында прокуратура органдарына арыз менен 35 жаштагы У.У. кайрылып, Ысык-Көл райондук сот аткаруучулар кызматынын сот аткаруучусу жана банк кызматкерлери тарабынан жасалган алдамчылык иш-аракеттеринин натыйжасында, аукциондо кыймылсыз мүлктү сатууда өзгөчө ири өлчөмдө зыян келтирилгенин билдирген.
Аталган арыз 204-берененин 2-бөлүгүнүн 2-пункту (Адамдардын тобу же алдын ала сүйлөшүү боюнча адамдардын тобу тарабынан ири өлчөмдө алдамчылык жосуну) менен катталган.
16-мартта шектүү катары Ысык-Көл районунун сот аткаруучулар кызматынын сот аткаруучусу, Бостери айылынын тургуну А.Э. болуп чыгып, ага 320-берене (Кызмат абалынан кыянаттык менен пайдалануу) менен кылмышка шектелип жаткандыгы жөнүндө билдирүү берилген.
А.Э. соттун чечими менен баш коргоо чарасы кабыл алынганча Ысык-Көл РИИБдин убактылуу кармоочу жайына киргизилген. Алдын ала тергөө маалыматтары боюнча, анын кылмыштуу аракеттеринен мамлекетке төрт жарым миллион сомдон ашуун зыян келтирилгени айтылат.
