Түркиянын Эрзурум шаарында Паландокен форумунун алкагында Экономикалык Кызматташтык Уюмуна (ЭКУ) мүчө мамлекеттердин туризм министрлеринин 6-жыйыны өттү.
Иш-чаранын жүрүшүндө тарыхый чечим кабыл алынды: Каракол шаары 2029-жылы ЭКУнун туристтик борбору болот.
Чечим ЭКУга мүчө мамлекеттердин бардык туризм министрлери тарабынан бир добуштан колдоого алынган Эрзурум декларациясында расмий түрдө белгиленди. Караколдун талапкерлиги бир катар катуу критерийлерге, анын ичинде туризм инфраструктурасынын болушу, жаратылыш жана маданий кооздуктар, туризмди туруктуу өнүктүрүү жана аймактар аралык жеткиликтүүлүктүн негизинде жактырылды.
ЭКУнун маалыматы боюнча, туристтик борборлорго коюлган негизги талаптарга экологиялык туруктуулук, маданий көп түрдүүлүк, транспорт тармагын өнүктүрүү жана эл аралык туристтик агымдарды кабыл алуу мүмкүнчүлүгү кирет.
