Улуттук коопсуздук мамлекеттик комитети (УКМК) эл аралык террористтик уюмдардын ишмердүүлүгүнө каршы күрөшүү боюнча жүргүзүлгөн операциянын жүрүшүндө «Телеграм» мобилдик мессенджери аркылуу «Ирак жана Левант Ислам мамлекети» (ИГИЛ) уюмунун мүчөлөрү тарабынан ишке алынган **Кыргызстан жараны А.Ч.К.**ны кармады.

Маалыматка караганда, шектүү интернет аркылуу террордук топтордун идеологиясын изилдеп, бир нече жолу согуш жүрүп жаткан аймактарга чыгууга аракет кылган. Ошондой эле ал ок атуучу куралдарды сатып алуу мүмкүнчүлүгүн издегени белгилүү болгон.

Мындан тышкары, ал социалдык тармактардын активдүү колдонуучусу катары ИГИЛ уюмунун символикасы чагылдырылган видеолорду тараткан. Анын жашаган жеринен экстремисттик адабияттар, тыюу салынган уюмдун желеги жана уруксатсыз травматикалык тапанча табылган.

Бул факты боюнча КР Кылмыш-жаза кодексинин 255-беренеси (террористтик уюмдардын ишине катышуу) боюнча кылмыш иши козголуп, А.Ч.К. Ысык-Көл облусунун Каракол шаарындагы №27 тергөө абагына киргизилди. Учурда тиешелүү тергөө иштери жүрүп жатат.