Кечээ, 28-апрелде ТИМди Консулдук департаменти Түркияда кармалган кыргызстандык мугалим Азамат Нурмат уулунун үй-бүлөсү менен жолугушуу өткөрдү.
Жолугушууда Азамат Нурмат уулунун үй-бүлөсүнө анын укуктарын жана мыйзамдуу кызыкчылыктарын коргоо боюнча аткарып жаткан иштер тууралуу маалымат берилген. Түркиянын мыйзамдары тууралуу, тергөө жана процессуалдык иш-аракеттерди жүргүзүү боюнча кеңири түшүндүрүлгөн.
«Ошондой эле үй-бүлөсүнө адвокат менен түз байланыш түзүү жана Азамат Нурмат уулун үй-бүлө мүчөлөрү менен телефон аркылуу сүйлөшүүсүн уюштуруу боюнча иштер уланууда», — деп билдирди ТИМ.
Эске салсак, “Маариф” (мурдагы “Сапат”) фондунун Ысык-Көлдөгү Кусеин Карасаев балдар лицейинин математика мугалими Азамат Нурмат уулу Түркияга окуучуларын олимпиадага алып барганда Стамбул аэропортунда кармалган. 28-апрелде Жогорку Кеңештин комитетинин жыйынында тышкы иштер министринин орун басары Алмаз Имангазиев Азамат Нурмат уулу диниятчы Фетхулла Гүлендин “Хизмет” (Түркияда террордук уюм деп эсептелинет) кыймылына байланыштуу кармалганын билдирген.
