КР Улуттук коопсуздук мамлекеттик комитети Ош облусунун аймагында ыкчам иш-чараларды жүргүзүү учурунда ок атуучу куралдар жана ок-дарылар катылган ири жайды тапты. Мекеменин маалыматы боюнча, арсенал «Дженго» каймана аты менен белгилүү Кадыр Досоновдун уюшкан кылмыштуу тобунун (УКТ) мүчөлөрүнө таандык болгон.

Жашыруун жайды текшерүү учурунда атайын кызматтын кызматкерлери 12 даана Калашников автоматын, «Беретта» жана «Макаров» үлгүсүндөгү согуштук тапанчаларды, сайсыз кесилген мылтыктарды, ошондой эле АК үчүн 11 магазинди жана ар кандай калибрдеги 800дөн ашык окту алышкан.

Тергөө материалдарына ылайык, куралдар өзгөчө оор кылмыштарды жасоого жана массалык башаламандыктарды уюштурууга багытталган. УКТ мүчөлөрү арсеналды ички саясий кырдаал курчуп кетиши мүмкүн болгон учурда бийликти конституцияга каршы жол менен алмаштыруу үчүн колдонууну пландашканы аныкталды. Кылмыштуу элементтер куралдуу төңкөрүш жасоого жана көзөмөлдөгү саясий ишмерди бийликке алып келүү үчүн трансулуттук кылмыштуу топтордун жана эл аралык экстремисттик уюмдардын колдоосуна ишенишкен.

Белгиленгендей, жашыруун жайдын өз убагында табылышы топтун материалдык-техникалык базасын жок кылууга жана куралдуу провокациялардын алдын алууга мүмкүндүк берди. Учурда алынган куралдар баллистикалык экспертизага жөнөтүлдү. УКМК уюштуруучуларды, каржы демөөрчүлөрүн жана Кыргыз Республикасындагы кырдаалды туруксуздаштыруу боюнча аракеттерди пландоого катышы бар башка адамдарды аныктоо боюнча тергөө иштерин улантууда.