Жалал-Абад облусунун Токтогул районунда жайгашкан Сары-Таш каналына бетон полотно төшөлүп, сугат сууну жеткирүү жакшырды.

Айыл чарба министрлигинин маалыматында, узундугу 3500 метрди түзөт, ал секундасына 1,5 м³ сууну өткөрүүгө жөндөмдүү. Канал 250 гектар айдоо жерди суу менен камсыздайт.

Канал жерден казылып жасалгандыктан, жыл сайын камыш өсүп, суунун өткөрүмдүүлүгүн азайтып, сугат суунун коромжуга учурашына алып келип турган. Бул маселе 2024-жылы өткөн 3-Элдик курултайда көтөрүлүп, Сары-Таш каналына бетондук полотно төшөө иштери пландалган.

Мындан улам каналдын 1 миң 500 метр аралыгына жаңы ыкма менен бетондук полотно төшөлүп, иштер толугу менен аяктаган.

Министрлик бул сугат суусун үзгүлтүксүз жеткирүү мүмкүнчүлүгүн кеңейтип, айдоо аянттардагы суу тартыштыгын олуттуу түрдө азайтууга шарт түзөрүн билдирди.