Жогорку Сот Жогорку Кеңештин мурдагы депутаты Карганбек Самаковдун соттолгондугун жокко чыгарды. Бул тууралуу Reporter.kg’ге соттун басма сөз кызматы билдирди.
Жогорку Соттун 2021-жылдын 3-февралындагы чечими менен Октябрь райондук сотунун 2017-жылдын 19-декабрындагы жана Бишкек шаардык сотунун 2018-жылдын 1-июнундагы Карганбек Самаковго чыгарган өкүмдөрү жокко чыгарылып, кылмыш иши соттун башка курамында Бишкек шаарынын Октябрь райондук сотуна жаңы кароого жиберилген.
Байтик, Лебединовка жана Кара-Жыгач айыл өкмөттөрүнүн жер тилкелери айыл чарба жерлеринин категориясынан калктуу конуштардагы жерлер категориясына мыйзамсыз которулгандыгы боюнча Самаковго жана башкаларга кылмыш иши козголгон.
