Сокулук районундагы мамлекеттик мекеменин кызматкери жумуш убактысында компьютердик оюн ойноого жол берип, социалдык тармактарга тараган видеонун негизинде иштен бошотулду. Бул тууралуу Курулуш жана архитектура министрлигинен билдиришти.
Маалыматка ылайык, окуя 2025-жылдын 8-июлунда болгон. Шаар куруу жана архитектура департаментинин Сокулук райондук башкармалыгындагы кызматкер М.Н.Н. иш убактысында кызматтык компьютерде оюн ойноп отурганы видеого түшүп калган.
Министрлик билдиргендей, Кыргыз Республикасынын Эмгек кодексинин 43-беренесине ылайык, 2025-жылдын 10-июлунан тартып аталган кызматкер долбоорлоо бөлүмүндөгү кызматынан бошотулду.
