Жогорку Кеңештин жыйынында депутат Каныбек Иманалиев премьер-министр Мухаммедкалый Абылгазиевге кайрылып, 1-майдан тарта уруксат берилген тармактардын жоболору Казакстандан көчүрүлгөнүн айтып чыкты.
“Токтомду жазганда ылайыктап жазбайсыңарбы? 1-майдан тартып уруксат бериле турган ишканалар боюнча: химиялык өнөр жай, машина куруу жана прибор жасоо Кыргызстанда барбы? Казакстандан көчүргөнүңөрдү жашырбайсыңарбы?! Кана машина курган эки ишкананы айтып бериңизчи? Бизде экономиканы баккан 4 тармак: соода, тейлөө, курулуш жана тигүү тармагы 1-майдан баштап иштеши керек», — деди Иманалиев.
Ошондой эле ал Өзбекстан менен Казакстан миллиарддап элге жардам берип жатса, өкмөттүн элге ун берүү менен чектелгенин сындады.
Премьер-министр Мухаммедкалый Абылгазиев уруксат бериле турган тармактардын тизмесин эл өкүлүнө өзүнчө берерин айтты.
Буга чейин Өкмөт 1-майдан тарта өзгөчө абал режимине карабай уруксат берилген экономикалык ишмердүүлүктүн түрлөрүнүн тизмегин жарыялаган.
