Казакстандын Ведомстволор аралык комиссиясы өлкөдө курула турган биринчи атомдук электр станциясынын (АЭС) башкы подрядчысы катары Россиянын “Росатом” мамлекеттик корпорациясын тандады. Бул чечим бардык талапкерлердин сунуштарын кылдат изилдеп, талдоо жүргүзгөн соң кабыл алынган.
Комиссиянын маалыматына караганда, тандоо акыркы этабына өзөктүк энергетика тармагындагы дүйнөлүк төрт алдыңкы компания чыкты:
- CNNC (Кытай)
- EDF (Франция)
- KHNP (Түштүк Корея)
- Росатом (Россия)
Бул компаниялар курулуш наркы, мөөнөттөр, финансылык моделдер жана өндүрүштү локалдаштыруу пландарын камтыган комплекстүү сунуштарды беришкен. Катуу атаандаштык шартында “Росатом” Казакстандын улуттук кызыкчылыктарына эң туура келген талапкер катары табылды.
Учурда долбоор боюнча толукталган консорциумду түзүү процесси жүрүп жатат. Бул долбоор Казакстандын энергетикалык көз карандысыздыгын камсыздоого жана жашыл энергияга өтүү максаттарына чоң салым кошот деп күтүлүүдө.
