Жайыттарды калыбына келтирүү максатында ушул жылдын күзүндө жайыттарга үрөн себүү иштери жүргүзүлөт. Бул тууралуу Айыл чарба министрлиги билдирди.

Маалыматка ылайык, бул үчүн республикалык бюджеттен 50 млн сом бөлүнгөн. Жалпысынан 173 миң 292 кг жайыт чөптөрүнүн үрөнү: кылкансыз кызыл от, таракбаш, шалбаа бетегеси жана эспарцет сатып алынып, кеч күздө жайыт аянттарына себилет.

Министрлик бул аракеттер жайыттардын деградациясынын алдын алууга, мал чарбасын өнүктүрүүгө жана тоюттун сапатын жакшыртууга багытталганын билдирди.

Белгилей кетсек, өлкө боюнча жалпы жайыт аянты 8 млн 985 миң 813 гектарды түзсө, анын ичинен 139 миң 404 гектары деградацияга учураган. 2025-жылы эс алууга калтырылган жайыттардын аянты 401 398,15 гектарды түзөт.