Акыйкатчынын кийлигишүүсүнөн кийин жашы жете элек кызды сойкулукка мажбурлаган кылмыш иши кайра тергөөгө жөнөтүлдү. 

Акыйкатчы институтунун маалыматына ылайык, бир ай бою сексуалдык кулчулукка кабылган 15 жашар кыздын жакындары кайрылып, кыздын укугун коргоп берүүнү өтүнүп,  тергөө объективдүү болбой, айыпталуучулар жазадан кутулуп кетиши мүмкүн экенин айтышкан.

Апасынын айтымында, 2024-жылы кызы үйдөн чыгып кетип, бир айдай дайынсыз болгон. Өспүрүм кызды жаңы таанышы акчалай жана башка колдоолорду убада кылып, үйүнө чакырган. Бирок көп өтпөй ал өспүрүмдөн жатакана жана тамак-аш акысы катары 20 миң сом талап кылган.

Бир нече күндөн кийин иштеп карызды кутуласың деп коркутуп, кызды башка аялга өткөрүп берген. Ал өспүрүмдү сабап, телефонун тартып алып, баңгизат берип, сойкулукка мажбурлаган. Кыз алтынчы кабаттан секирүүгө аракет кылганда кошуналар батирдин ээсине телефон чалган. Ал келгенде кыз батирден качып чыгууга үлгүргөн жана кошуналардын эшигин каккылап, жардам сураган.

2024-жылдын 26-сентябрында Биринчи Май РИИБ кылмыш ишин козгоп, эки аял кармалган. Бирок тергөө маалында кылмыш иши 159-берененин 3-бөлүгүнөн 1-бөлүгүнө өзгөртүлүп,жазаны жеңилдөөтү аракети көрүлгөн. Ага кошумча, Биринчи Май райондук прокуратурасынын кызматкерлери айыпталуучулар менен күнөөнү моюнга алуу тууралуу процессуалдык келишим түзүшкөн.

Кийин кызга райондук сот тарабынан болгону 100 миң сом айып салынган өкүм чыккан.Жабырлануучунун адвокаты бул өкүмгө нааразы болуп, шаардык сотко апелляциялык арыз берген. Ал эми, экинчи аял боюнча иш биринчи инстанцияда каралып жаткан.

“Жамиля Жаманбаева Башкы прокуратурага өспүрүм кыздын укуктарын коргоону жана айыпталуучулардын кылмыш иштерин жеңилдетип өзгөртүүнүн мыйзамдуулугун жана түзүлгөн процессуалдык келишимдин негиздүүлүгүн текшерүү зарылдыгын белгилеп расмий кат жолдойт”,-деп айтылат маалыматта.