Тышкы иштер министрлиги өлкө аймагында чет өлкөлүк жарандардын жүрүү тартиби өзгөртүлгөнүн маалымдады. Ага ылайык, жүрүү мөөнөтүнөн өтүп кеткен же документтерин өз убагында бүтүрбөгөн этникалык кыргыздарга жана алардын үй-бүлө мүчөлөрүнө Кыргызстандын аймагына бир жолу кирүү укугу берилет. Аталган жарандар 30 жумушчу күндүн ичинде өзүнүн укуктук макамын легалдаштырууга тийиш.

Киргизилген өзгөртүүлөр миграциялык процесстерди жөнгө салууга жана чет өлкөлүк жарандардын жүрүүсүн мыйзамдаштыруу механизмдерин тартипке келтирүүгө багытталган.

Тиешелүү чечим Министрлер кабинетинин токтому менен кабыл алынды. Токтом расмий жарыялангандан кийин он күн өткөндөн соң күчүнө кирет.