Кытайдын мамлекеттик Синьцзян темир жол изилдөө жана долбоорлоо компаниясы менен Кыргызстандын Соода-өнөр жай палатасы инфраструктура жаатында кызматташат. Бул тууралуу аталган палатанын басма сөз кызматы билдирди.

Маалыматка ылайык, Кыргызстандын бизнес-делегациясы Соода-өнөр жай палатасынын президенти Темир Сариевдин жетекчилиги астында Кытайдын Үрүмчү шаарына барып, аталган компаниянын өкүлдөрү менен жолугушуу өткөрүшкөн.

Жолугушууда кытайлык компания Кайыңды — Балыкчы жана Балыкчы — Чолпон-Ата транспорттук багыттарын куруу боюнча алдын ала техникалык чечимдерди сунуштаган.

Андан кийин эки тараптын ортосунда кызматташтык тууралуу меморандумга кол коюлган. Документ стратегиялык мааниге ээ инфраструктуралык долбоорлорду биргелешип ишке ашырууну карайт.

Белгилей кетсек, Синьцзян темир жол изилдөө жана долбоорлоо компаниясы «Кытай — Кыргызстан — Өзбекстан» стратегиялык транспорт коридорунун долбоорун иштеп чыгууга катышкан. Ошондой эле ал автомобиль, темир жолдорду долбоорлоо тармагында чоң тажрыйбага ээ.