Таиландда жүргүнчү ташуучу поезд кырсыкка учурап, 32 адам каза тапты. 64кө жакын жүргүнчү ар кандай жаракат алып, дагы 3 адам дайынсыз болууда. Бул тууралуу Bangkok Post басылмасы билдирди.

Кырсык поезд Бангкок – Убон Ратчатхани каттамы боюнча жүрүп баратканда болгон. Курулуш краны темир жолго кулап түшүп кетип, жүрүп бара жаткан поезд рельстен чыккан. Андан кийин ал өрттөнүп кеткен.

Маалыматка ылайык, курулуш краны тай-кытай жогорку ылдамдыктагы темир жолун курууда колдонулган. Кран кулагандан кийин машинист өз убагында токтой албай, поезд кулап жаткан кранга барып урулган.

Кыргызстандын Тышкы иштер министрлиги маалымат таратып, жабыркагандардын жана каза болгондордун арасында кыргызстандык жарандар жок экенин билдирди.