Кыргызстандын Мамлекеттик камсыздандыруу уюму (МКУ) жарандарды СМС-билдирүүлөр аркылуу жапырт маалымдоого киришти. Билдирүүлөрдө мекеме «Турак жайларды өрттөн жана жаратылыш кырсыктарынан милдеттүү камсыздандыруу жөнүндө» мыйзамды аткаруу зарылдыгын эске салып, ошондой эле унаа ээлерин ОСАГО полистерин өз убагында жол-жоболоштурууга чакырат.

МКУдан белгилешкендей, камсыздандыруу биринчи кезекте жарандардын мүлктүк кызыкчылыктарын коргоого багытталган. Билдирүүдө көрсөтүлгөндөй, турак жайды милдеттүү камсыздандыруу полисин уюмдун аймактык кеңселеринде ELQR системасы аркылуу төлөө мүмкүнчүлүгү менен алууга болот. Ал эми айдоочулар үчүн жөнөкөйлөтүлгөн механизм каралган: ОСАГО полисин MegaPay мобилдик тиркемеси аркылуу онлайн режимде сатып алуу жеткиликтүү.

Буга чейин мыйзамдарга өзгөртүүлөр киргизилип, ага ылайык камсыздандыруу полисинин болушу кыймылсыз мүлк менен болгон ар кандай бүтүмдөрдү каттоо же аны күрөөгө коюу үчүн милдеттүү шарт болуп калган. Камсыздандыруунун жоктугу үчүн айып пул 2 000 сомду түзсө, базалык полистин баасы 1 700 сомдон башталат. Камсыздандыруу окуясы катталган учурда мамлекет 700 000 сомго чейин компенсация төлөп берет.

2025-жылдын августуна карата маалымат боюнча, республикада 372 миңден ашык кыймылсыз мүлк объектиси камсыздандырылган, бул өлкөнүн турак жай фондунун 30%га жакынын түзөт.