Бишкекте Саламаттыкты сактоо министрлигинин коллегиясынын 2025-жылдагы ишмердүүлүгүнүн жыйынтыктары жана 2026-жылга артыкчылыктарды аныктоо боюнча отуруму болуп өттү. Иш-чарага Министрлер кабинетинин төрагасынын орун басары Эдил Байсалов, саламаттыкты сактоо министри Каныбек Досмамбетов, Жогорку Кеңештин депутаттары жана өлкөнүн медициналык мекемелеринин жетекчилери катышты.

Отурумдун жүрүшүндө тармакты каржылоонун кыйла көбөйгөнү белгиленди. 2025-жылы саламаттыкты сактоо системасынын бюджети 52,4 млрд сомго жеткен, ал эми 2030-жылга чейин бул көрсөткүчтү 130 млрд сомго чейин жогорулатуу пландалууда. Эдил Байсалов бөлүнгөн каражаттын өсүшү кызмат көрсөтүүнүн сапатына түздөн-түз таасир этиши керектигин баса белгиледи. Анын айтымында, реформалардын натыйжалуулугу формалдуу отчеттор менен эмес, калк үчүн дарыгерлердин, дары-дармектердин реалдуу жеткиликтүүлүгү жана медициналык жабдуулардын оң абалы менен бааланат.

2025-жылдын негизги жетишкендиктеринин катарында төмөнкүлөр бөлүп көрсөтүлдү:

• медициналык объекттерди масштабдуу куруу жана капиталдык оңдоо;
• жабдуулар паркын жаңылоо жана санариптик кызматтарды өнүктүрүү;
• КР Президентинин Жарлыгынын алкагында Бишкекте медициналык шаарча долбоорун ишке ашыруунун башталышы.

2026-жылга министрликтин алдына эне жана баланын ден соолугун коргоону күчөтүү, ошондой эле стационарлардын ишинин натыйжалуулугун жогорулатуу боюнча милдеттер коюлду. Дары-дармек менен үзгүлтүксүз камсыздоо маселелерине өзгөчө көңүл бурулду. Кабмин башчысынын орун басары мындай окуяларды жол берилгис башкаруу каталары деп мүнөздөп, жашоо үчүн маанилүү дары-дармектерди жеткирүүдөгү үзгүлтүктөргө карата «нөлдүк чыдамдуулук» саясатын киргизүү тууралуу билдирди.

Коллегиянын жыйынтыгы менен аткаруу тартибин күчөтүү боюнча чаралар аныкталды. Саламаттыкты сактоо уюмдарынын жетекчилери ресурстарды сарамжалдуу пайдалануу жана медициналык жардамдын коопсуздук стандарттарын сактоо үчүн жеке жоопкерчилик тартышат. Министрлик 2030-жылга чейин өнүктүрүүнүн улуттук максаттарына жетүү үчүн «Дени сак адам – гүлдөгөн өлкө» программасынын алкагында ишти улантат.