Жогорку Кеңештин тармактык комитетинде Министрлер кабинети тарабынан демилгеленген «Баа түзүү жөнүндө» мыйзамга өзгөртүүлөрдү киргизүү маселеси талкууланды. Аткаруу бийлигинин негизги сунушу мамлекеттин ыйгарым укуктарын кеңейтүү болду: өкмөт социалдык мааниге ээ товарлардын гана эмес, иштердин жана кызмат көрсөтүүлөрдүн белгилүү бир тизмесинин баасын жөнгө салуу укугун алууга ниеттенүүдө.

Экономика жана коммерция министринин орун басары Беназир Нурланова депутаттарга мындай чаралардын зарылчылыгы рыноктук динамика менен шартталганын түшүндүрдү. Статистикага ылайык, 2024-жылдын аягына карата кызмат көрсөтүү секторундагы тарифтер 8 пайыздан ашык өскөн, бул калк тарабынан түшкөн даттануулардын санынын көбөйүшүнө алып келген. Жаңы мыйзам долбоору жарандардын кызыкчылыгын коргоо зарыл болгон учурларда мамлекеттин баа түзүүгө кийлигишүүсү үчүн укуктук базаны түзүүгө багытталган.

Жөнгө салуунун маанилүү инструменти болуп «рентабелдүүлүк» түшүнүгүн киргизүү саналат. Документти иштеп чыгуучулар бизнестин пайдасын товарлардын же кызмат көрсөтүүлөрдүн өздүк наркынын 25 пайызы менен чектөөнү сунушташууда. Экономика министрлигиндегилер бул ыкманы жөнгө салуунун жумшак ыкмасы деп аташууда, анткени ишкерлер бааларды өз алдынча түзүү мүмкүнчүлүгүн сактап калышат, бирок белгиленген коридордун алкагында.

Талкуунун жүрүшүндө мамлекеттик көзөмөлгө алынышы мүмкүн болгон конкреттүү тармактар аталды. Монополияга каршы жөнгө салуу кызматынын төрагасы Женалы Орозбаев сөз социалдык мааниге ээ багыттар, маселен, университеттердеги окуу акысы жөнүндө болуп жатканын белгиледи. Депутаттар тизмени калк үчүн сезимтал болгон башка позициялар, анын ичинде турак жай ижарасы, унааларды эвакуациялоо кызматтары, ошондой эле жеке мектептер менен бала бакчалардагы төлөмдөр менен толуктоону сунушташты.