Министр Азамат Жамангулов жетектеген Санариптик өнүктүрүү жана инновациялык технологиялар министрлиги Apolitical эл аралык тармагы менен өнөктөштүктү демилгелөөдө. Кызматташтыктын максаты — мамлекеттик кадрлардын квалификациясын жогорулатуу жана жасалма интеллектти (ЖИ) башкаруу тутумуна киргизүү.

Өнөктөштүктүн алкагында кыргызстандык мамлекеттик кызматкерлер ЖИ жаатындагы алдыңкы тажрыйбанын дүйнөлүк борбору болгон Government AI Campus’ка кирүү мүмкүнчүлүгүн алышат. Google.org колдоосу менен ишке ашырылып жаткан бул программа дүйнө жүзү боюнча миллиондогон мамлекеттик кызматкерлерди санариптик технологиялар доорундагы лидерликке даярдоого багытталган.

Окутуу программасы төмөнкүлөрдү камтыйт:

• атайын мамлекеттик сектор үчүн ыңгайлаштырылган онлайн-курстарды;
• кесиптик иш-чараларга, брифингдерге жана аналитикалык инструменттерге жеткиликтүүлүктү;
• тажрыйба алмашуу үчүн глобалдык онлайн-коомдоштукка катышууну.

Министр Азамат Жамангулов демилге ЖИни киргизүү аркылуу мамлекеттик башкаруунун натыйжалуулугун жогорулатууга багытталганын белгиледи. Бул Кыргызстандын эл аралык санариптик экотутумга интеграциялануусун камсыздап, өлкөнү санариптик трансформациялоо үчүн бекем негиз түзөрү күтүлүүдө.

Reporter.kg маалымдамасы: Apolitical — 170 өлкөдөгү 500 миңге жакын адисти жана саясатчыны камтыган мамлекеттик кызматкерлер үчүн дүйнөдөгү эң ири онлайн-тармак. Платформанын миссиясы өкмөттөрдүн ишинин натыйжалуулугун жогорулатуудан турат. Бул үчүн Apolitical мамлекеттик органдарга керектүү инструменттерди, көндүмдөрдү жана кесиптик тармактарга жеткиликтүүлүктү сунуштап, кадрдык потенциалга келечектеги чакырыктарга ыңгайлашууга жардам берет.