Парламенттин Эл аралык иштер, коргоо, коопсуздук жана миграция боюнча комитети Казакстан менен өткөрүү пункттары жөнүндө өкмөттөр аралык макулдашууга өзгөртүү киргизүү тууралуу протоколду ратификациялоо боюнча мыйзам долбоорун жактырды. Документ кыргыз-казак чек арасындагы эки автожол өткөрүү пунктунун иштөө мүмкүнчүлүгүн кеңейтүүнү жана аларга эл аралык статус берүүнү карайт.

Мыйзам долбоорунун текстине ылайык, протоколго 2025-жылдын 22-августунда Бишкекте Казакстандын президенти Касым-Жомарт Токаевдин Кыргызстанга болгон мамлекеттик сапарынын алкагында кол коюлган. Документти ратификациялоо 2003-жылдын 25-декабрындагы негизги макулдашууга өзгөртүүлөрдү киргизүүгө мүмкүндүк берген мамлекеттик ички жол-жоболорду аткаруу үчүн зарыл.

Жактырылган өзгөртүүлөргө ылайык, «Камышановка автожол» өткөрүү пункту «Төмөнкү Чүй автожол» деп өзгөртүлөт. Ушундай эле өзгөрүү «Кичи-Капка — автожол» өткөрүү пунктун да күтөт. Протокол күчүнө киргенден кийин эки көзөмөл-өткөрүү пункту тең эл аралык статуска ээ болуп, күнү-түнү (24/7) иштөө режимине өтөт.

Кыргызстандын өкмөтү өткөрүү пункттарын модернизациялоо жана статусун өзгөртүү чек ара аркылуу өтүүнү оптималдаштырууга, жарандар жана ташуучулар үчүн убакыт чыгымдарын азайтууга мүмкүндүк берет деп эсептейт. Бул жаңылыктар жүк жана жүргүнчү агымынын өсүшүнө шарт түзүп, өлкөгө келген чет элдик туристтер үчүн дагы ыңгайлуу шарттарды жаратат деп күтүлүүдө. Мындан тышкары, эки мамлекеттин чек ара инфраструктурасын өнүктүрүү жана өркүндөтүү артыкчылыктуу багыттардын катарында турат.