OpenAI компаниясы Sora видеогенераторунун иши аяктагандыгын расмий түрдө билдирди. Тексттик сыпаттамалардын негизинде кыска видеороликтерди жаратууга мүмкүндүк берген бул долбоор жакынкы арада жабылат.

Иштеп чыгуучулар долбоордун X социалдык тармагындагы расмий баракчасына коштошуу билдирүүсүн жарыялашты.

«Биз Sora менен коштошобуз. Анын жардамы менен чыгармачылык кылгандарга, натыйжалары менен бөлүшкөндөргө жана коомчулукту калыптандыргандардын баарына — рахмат. Сиздердин жасаган ишиңиздер маанилүү болчу жана бул жаңылык көңүлүңүздөрдү калтырышы мүмкүн экенин түшүнөбүз», — деп айтылат билдирүүдө.

Жумушчу топ жакынкы арада колдонуучуларга тиркеменин жана API’дин өчүрүлө турган так мөөнөттөрү, ошондой эле буга чейин жаратылган материалдарды сактап калуу боюнча нускамалар тууралуу кошумча маалымат берилерин убада кылды.

The Wall Street Journal басылмасынын маалыматына ылайык, OpenAI компаниясынын башкы директору Сэм Альтман 24-мартта кызматкерлерине долбоордун жабылышы тууралуу кабарлаган. Коомчулукка жарыяланган билдирүүдө расмий себептер такталган эмес, бирок WSJ булактары бир нече факторлорду аташууда.

Биринчиден, долбоор эбегейсиз зор эсептөө ресурстарын талап кылган, ошол эле учурда мындай салымдарды актай турган ачык-айкын масштабдуу суроо-талап байкалган эмес. Экинчиден, Sora долбоорунун жабылышы OpenAI’дин артыкчылыктарды өзгөртүү боюнча масштабдуу стратегиясынын бир бөлүгү болуп саналат: компания акцияларды алгачкы ачык жайгаштырууга (IPO) чыгуу алдында бизнес-чечимдерди жана программалоо куралдарын иштеп чыгууга басым жасоону көздөп жатат.

Sora нейрон тармагы биринчи жолу 2024-жылдын февралында тааныштырылып, видеолордун жогорку сапаты менен дүйнөлүк технологиялык коомчулуктун көңүлүн дароо бурган. 2025-жылдын күзүндө компания анын жаңыланган версиясын — Sora 2’ни чыгарган, бирок эми бул технологияны өзүнчө тиркеме форматында өнүктүрүү токтотулат.