Чүйдүн Новопокровка айылында 100 орундуу облустук төрөт үйү ачылат. Учурда оорукананын имаратында оңдоо иштери жүрүүдө. Ал үстүбүздөгү жылдын ноябрь айына чейин бүткөрүлөт. Бул тууралуу Саламаттык сактоо министрлиги билдирди.

Саламаттык сактоо министри Дамир Осмонов аталган ооруканада жүргүзүлүп жаткан оңдоо иштеринин жүрүшү менен таанышкан. Министр оңдоо иштерин мөөнөтүндө аяктоону жана аткарылыш сапатын көзөмөлдөөнү тапшырган

Мекеменин маалыматында, Чүй облустук төрөт үйү мурда бала бакча катары иштеген имаратта жайгашкан. Жаңы төрөт үйүн ишке киргизүү кош бойлуу аялдарга жана энелерге медициналык жардам көрсөтүү үчүн шарттарды түзүүгө, ошондой эле кызматтардын сапатын жогорулатууга багытталган.