Чечен республикасы Кыргызстанга жалпы суммасы 50 млн рублдан ашык болгон гуманитардык жардамды көрсөттү. Бул тууралуу республикалык штабдан кабарлашты.
“2-августунда Кыргызстан менен Орусиянын ортосундагы расмий сүйлөшүүнүн натыйжасында Чечен Республикасы тарабынан жалпы суммасы 51 млн 41 миң 917 рублга барабар болгон кайтарымсыз жардам жиберилди”, – деп жазылат маалыматта.
Гуманитардык жардам бүгүн кыргыз-казак чек арасынын “Ак Тилек” өткөрмө посту аркылуу Кыргызстанга киргизилген жана тийиштүү процедуралар өткөрүлгөндөн кийин Саламаттык сактоо министрлигинин Дары-дармек менен камсыздоо жана медициналык техника департаментинин кампасына түшүрүлөт.
Орусиянын “Фармстандарт” ачык акционердик коому Саламаттык сактоо министрлигине гуманитардык жардам катары:
- коргоочу комбинезондор — 24 100 даана;
- үч кабаттуу беткап — 24 729 даана;
- полимердик материалдан жасалган көз айнек — 5248 даана;
- бет калкандар — 10 649 даана жана башка медицина тармагына муктаж болгон каражаттар берилген.
