Женишбек Байгуттиев президенттик шайлоого катышуу үчүн Борбордук комиссиясына арыз берди. Бул тууралуу БШКнын басма сөз кызматынан кабарлашты.
Маалыматка ылайык, кечээ, 10-ноябрда Президенттик кызматка өзүн өзү талапкерликке көрсөтүү тууралуу «Толубай» АКБ ЖААнын директорлор кеңешинин мүчөсү Байгуттиев Женишбек Сейтбековичтен БШКга арыз түшкөн.
Буга чейин президенттик шайлоодо талапкер болуп катышуу үчүн Адахан Мадумаров, Арстанбек Абдылдаев, Кубан Чороев, Назарбек Нышанов, Бектур Асанов, Бакыт Бакетаев, Канатбек Исаев, Абдыкаар Сыдыков, Сазыкбай Турдумалиев, Нурлан Мотуев жана Рашид Тагаев БШКга арыз берген.
Белгилей кетсек, мөөнөтүнөн мурда өтчү президенттик шайлоо 2021-жылдын 10-январына белгиленген. Талапкер болууну каалагандар 15-ноябрга чейин БШКга арыз берип, 7-декабрга чейин бир миллион сомдук күрөөнү жана керектүү документтерди тапшырышы керек.
