Германиялык альпинист Гюнтер Зигмунд REN TV телеканалына Жеңиш чокусунда калып калган россиялык альпинист Наталья Наговицинаны куткаруу аракеттерин айтып берди.

Ага италиялык кесиптеши Лука Синигалья жардам берген, бирок Луканын оң колун үшүк алып, андан соң мээси шишип каза болгон.

Гюнтер, Лука, Наталья жана дагы эки альпинист Роман менен Пол эртең менен чокуга көтөрүлүшкөн. Түн ортосунда Гюнтер, Наталья жана Роман чокуга жетишкен, ал эми Лука манжаларын үшүк алгандыктан артка кайтууга мажбур болгон. Кийин түшүп келүү учурунда аба ырайы кескин начарлап, Гюнтер Луканын жанындагы кардан жасалган үңкүргө кайтып барган. Наталья менен Роман ошол күнү кайтып келишкен эмес.

Анын айтымында, 12-августта Наговицына 7200 метр бийиктикте бутун сындырган. Ага жардам берүүгө Лука жана Гюнтер көтөрүлүп, тамак-аш менен газ жеткиришкен. Бирок аба ырайы куткаруу иштерине жолтоо болгон.

Куткаруу аракетинин жүрүшүндө Луканын колун үшүк алып, абалы кескин начарлап кеткен. 15-августта ал лагерге жетпей каза болуп, Зигмунддун колунда жан берген.

Эскерте кетсек, учурда Наталья Наговицына 7200 метр бийиктикте, абалы белгисиз. Аны эвакуациялоо тик учак жана кесипкөй альпинисттер тобу менен гана мүмкүн болот.

Лука Синигальянын жансыз денеси 6900 метрде жатат. Аны түшүрүү, туугандары чечим чыгарса, кийинки жылы гана ишке ашышы мүмкүн.

Куткаруу операциясы аба ырайынын начардыгынан улам токтотулган.